Tentsver.mn

Л.ЭНХ-АМГАЛАН:Сурагчдын сүүлийн долоо хоногийн хичээлийг цахимд шилжүүлж, энэ сарын 18-наас амралтыг эхлүүлнэ

Admin | 2021-11-30

Засгийн газрын хуралдаанаар бүх шатны боловсролын байгууллагын амралтыг хэзээнээс эхлүүлэх талаар хэлэлцлээ. Хуралдаанаас гарсан шийдвэрийн талаар Боловсрол, шинжлэх ухааны сайд Л.Энх-Амгалан мэдээллээ.

ЦЭЦЭРЛЭГ

Сургуулийн өмнөх боловсролын байгууллага нь жил бүрийн есдүгээр сарын 1-нээс зургаадугаар сарын 1-н хүртэл хичээллэдэг билээ. Цар тахлын нөхцөл байдал, томуугийн улирал эхэлж байгаатай холбоотойгоор энэ оны арванхоёрдугаар сарын 10-наас хоёрдугаар сарын 3-ны өдрийг дуустал хичээл, сургалтын үйл ажиллагааг түр зогсоохоор төлөвлөсөн.

Эцсийн шийдвэрийг даваа гаригт танилцуулна.

ЕРӨНХИЙ БОЛОВСРОЛЫН СУРГУУЛЬ

Ерөнхий боловсролын сургуулиуд хуваарийн дагуу арванхоёрдугаар сарын 18-ны өдрөөс нэгдүгээр улирлын амралт эхлэх ёстой. Тэгвэл цар тахлын нөхцөл байдал, томуугийн улирал эхэлж байгаатай холбогдуулан сүүлийн долоо хоног /арванхоёрдугаар сарын 13-17/-ийн хичээлийг 100 хувь цахим хэлбэрт шилжүүллээ. Ингэснээр сурагчид арванхоёрдугаар сарын 18-наас ирэх хоёрдугаар сарын 3-ныг хүртэл амарна.

ИХ, ДЭЭД СУРГУУЛЬ

Их, дээд сургуулиуд арванхоёрдугаар сарын 10-ны өдөр хүртэл хичээллээд амарна. Амарсан өдрөөс эхлэн зарим шалгалтыг цахимаар өгнө. Биечилж өгөх шаардлагатай шалгалтыг хоёрдугаар сарын эхэнд зохион байгуулахаар төлөвлөж байна.